#rdc_2023#cumpriuseaxustiza

Compartimos o Manifesto da Asociación de Escritoras e Escritores en Lingua Galega no Día de Rosalía de Castro 2023. Tal como afirma Carme Adán, autora do Manifesto, “Rosalía ensínanos a mirar e a escoitar. É unha guía, por momentos unha amiga ou unha camarada, que nos acompaña entre poemas, novelas e ensaios para superar a banalidade ética do noso tempo. As súas palabras dan existencia a un mundo de inxustizas e opresións contra as mulleres, os pobres, a lingua galega ou os migrantes. O seu narrar é a escoita do noso mundo.”

Escoitémola.

Na 19ª edición do Concurso de coplas de Entroido que organizamos desde o Equipo de Dinamización da Lingua Galega volvemos atoparnos con moito enxeño por parte do alumnado que, botando man da retranca, fala sobre a actualidade. E vaia se fala!

Todo este talento tivo premio. O primeiro foi parar a Paz Moreda Gasalla e Carmen García Vázquez, alumnas de 1º BACH; o segundo premio foi para Helena Celada Villarmea, tamén de 1º BACH; un terceiro premio recibiuno Pablo García Martínez, de 1º ESO.

Desde o Equipo agradecemos a alta participación e vaian os nosos parabéns para o alumnado que resultou gañador. Aquí deixamos as súas coplas:

Os premiados no Concurso de recitado de poesía sobre poemas de Rosalía de Castro e Manuel María son todos alumnos de 1º ESO.

O primeiro premio foi para Pablo García Martínez, que escolleu un poema de Manuel María. Hai, ademais, dous segundos premios: un para Martiño Álvarez Alonso e outro para Anxo Abad Oca.

Grazas por participar e parabéns polo voso recitado. Bravo!!

A principal homenaxe a Castelao neste xaneiro de 2023 por parte do Equipo de Dinamización Lingüística da Lingua Galega do IES de Foz concretouse en dúas accións: por unha banda, unha exposición sobre o artista total que foi, ubicada na entrada do Edificio A do centro, que pon a ollada en dedicatorias, indicacións para o lector, prólogos, limiares, ex libris…presentes na súa obra; por outra banda, para o noso “Relendo Castelao”, a lectura de dous relatos de Cousas nas voces de alumnado de 1ºESO (o que agradecemos a Pablo, Lois, Cristian, Antía, Naiara e Saínza), con montaxe e acompañamento musical seleccionado por Suso G. Cortázar.

Deixamos por aquí imaxes da exposición e ligazóns para os audios. Que vos presten! 😉

Castelao sempre!

As ligazóns para o “Relendo Castelao”:

Texto: “A condesiña”

Voces: Pablo, Lois e Cristian.

Música: O son do ar, de Luar na Lubre.

https://drive.google.com/file/d/17rd30emG2J_ubGbiA4wqBZijmu9VvcY8/view?usp=sharing

Texto: “Dona Sinforosa”

Voces: Antía, Naiara e Saínza.

Música: Penny Dreadful – Melting Waltz, de Abel Korzeniowski

https://drive.google.com/file/d/1o8s7uADssmw0k8WM2Tqz8d8S2zYnh3BP/view?usp=sharing

Deixámosvos por aquí as bases dos dous concursos que convocamos en xaneiro no Equipo de Dinamización da Lingua Galega.

A ver se vos animades a participar 😉

Dentro da actividade fixa do Equipo “A nosa historia facémola nós”, o alumnado investigou desta volta sobre hidronimia: o nome dun río, rego, regato, quenlla… Encomendámoslles procurar información, principalmente dentro da veciñanza e na familia, sobre a orixe do nome, ubicación, usos antigos e actuais… E así, contando tamén co apoio doutras fontes, podemos escribir con texto e imaxes parte da historia do concello e aprender sobre o lugar que habitamos, ao ocupármonos das formas de auga doce.

Moitas grazas ao alumnado de 2ºESO pola súa implicación nesta iniciativa, dentro da materia de Lingua Galega, e a Mariña, que forma parte do Equipo e colaborou cunha investigación excelente!

A seguir, imaxes dalgúns traballos:

Fala a auga!

E a agua é vital.

A tarxeta de Estela Pérez Suárez que ilustra esta entrada foi a gañadora do Concurso de postais para felicitar o ano novo 2023, organizado polo Equipo de Dinamización da Lingua Galega, en relación co tema promovido pola Biblioteca para o proxecto interdisciplinar do centro neste curso: a auga e a súa importancia nas nosas vidas e no planeta.

Deixámosvos aquí imaxes das postais que recibiron o segundo e o terceiro premio e da exposición ao completo.

Grazas a todos e todas por participar e ao profesorado pola súa colaboración.

Boas vacacións e feliz 2023!

Desta volta queremos compartir a adaptación radiofónica dunha escena teatral do texto As alumnas, de Paula Carballeira, unha gravación coas voces de alumnado do equipo (grazas a Mariña, Sofía, Xabi e Sofía!) e a achega musical de Suso C. (La Bejarana, do mestre F.Alonso y Serrano, e Gnossiennes, de Erik Satie).

Leccións aprendidas…ou non. Convidamos á reflexión. Escoitade:

https://drive.google.com/file/d/1z3anAGTPk__24FYITVyudHNHJugEZ0D6/view?usp=sharing

A piques de que a maioría dos escaparates, a publicidade… orienten a mensaxe á chegada do vindeiro Nadal, novembro e algo máis por medio, nós propoñemos de novo un concurso de tarxetas para felicitar o 2023. Velaí a ligazón:

https://drive.google.com/file/d/1qGotImTYuysYtuo4vCjxp9mkKbAx3EqV/view?usp=sharing

Remata setembro e aquí volvemos! 🙂

Para despedir o mes e antes de comezar a ver novos froitos das actividades propias do Equipo, compartimos o manifesto creado para a edición do Correlingua 2022 e aproveitamos para transmitir os nosos parabéns por un texto con moita mensaxe! É o resultado dos obradoiros ‘Desata a lingua’, impartidos por varias escritoras (María Lado, Ana Carreira, Tamara Andrés e Lucía Aldao) no que participaron alumnos e alumnas de diferentes centros (IES Da Pedra, IES A Pastoriza, IES Frei Martín Sarmiento, IES Nª Sª dos Ollos Grandes, IES de Brión, IES 12 de outubro, IES de Pontecaldelas e IES San Tomé de Freixeiro).

Nosoutros sumámonos. E ti? 😉

FÁLAME!

Míranos, aquí estamos, somos o futuro. Os soños que temos hoxe
construirán o mundo mañá. Pero hoxe falámosvos dende o presente,
queremos pedirvos que nos escoitedes e, sobre todo, que nos faledes. Por
que non me falas? FÁLAME!
O galego é unha lingua que transmite unha cultura, a lingua da que veñen
moitas das nosas familias, as palabras que fixeron medrar este lugar. Para
outras, é unha lingua nova, a dunha terra que se convirte na súa. Por que non
valoramos a lingua como facemos coas persoas, coa historia familiar, con
outros bens?
Amar e respectar unha lingua é tan importante como respectar a quen nos
rodea. Se temos tan preto o galego…por que non me falas? FÁLAME.
Familias, mestras e mestres, medios de comunicación, institucións…
Como vou falar se non me falas, ler se non me les, cantar se non me cantas?
FÁLAME!
Como imos apreciar algo que non nos axudades a coñecer? Comunícate
comigo e…FÁLAME!
Se tedes a obriga de coidar e facer medrar o galego… porque non o facedes?
Por que non me falas? FÁLAME!
Se tedes o compromiso de falarnos… por que non me falas? FÁLAME!
E, finalmente, a todas as persoas que compartides esta festa da lingua
queremos pedirvos tamén que nos faledes. Non teñades vergoña, as linguas
apréndense practicándoas. E saber falar diferentes linguas faite unha persoa
lista, atractiva, interesante, moderna, comprometida. O galego conéctanos
con cousas boas e fermosas, con xente talentosa e intelixente. Aproveita que
aínda podes… e FÁLAME!