Lembramos enredos e xogos e… facémolo nós!

Neste xuño tivemos que quedar sen xornada de xogos tradicionais no último día lectivo. Nin divertimento nin risos e apertas na despedida do curso. Mágoa! Mais…tivo que ser 😦

Non obstante, ata certo punto os xogos non faltaron. O alumnado dos cursos de 1º ESO e 2º ESO colaborou na actividade do Equipo “A nosa historia facémola nós” ao pescudar nas lembranzas sobre enredos e xogos da infancia de pais e nais, avós e avoas… para a materia de Lingua Galega.

Grazas ás familias por implicarse e ao alumnado por recuperar anacos da historia como os que aquí compartimos, a xeito de mostra.

Saúde e moi bo verán a tod@s! Ata a volta! 😉

Posicións das tabas

As nosas palabras para o 17 de maio, Día das Letras Galegas!

A idea de procurar as palabras galegas máis fermosas nada ten de orixinal. Vénse repetindo a iniciativa por parte de diversos colectivos arredor do Día das Letras Galegas, que neste 17 de maio rende homenaxe a Ricardo Carvalho Calero.

Entre tanta fermosura e riqueza da lingua propia a escolla non é doada, malia que axude cavilar nas palabras que mellor soan, as máis aqueladas na escrita, as que acompañan lembranzas positivas…

O que fai especial esta selección é que son as que nosoutros escollemos. Detrás dese “nosoutros” está alumnado de 1º e 2º ESO do IES de Foz, un encanto de rapazada que coas súas palabras galegas favoritas vai facer florecer en galego esta primavera na Mariña 🙂

E veñan mil primaveras máis e aínda outras mil! En galego, sempre!

As palabras galegas favoritas de Sofía R., Alba, Nara, Sergio, Marta, Sofía M., Ainhara, Mariña, Pablo, Alonso, Ariadna, Antía C., Héctor, Bruno, Helena, Carlos e Jacobo.

23 de abril, Día do Libro

Desde o Equipo de Dinamización da Lingua Galega non podiamos deixar pasar unha data así sen expresarnos, agradecendo aos libros tanto como nos dan.

Aquí queda unha mostra do que quixeron compartir connosco e coa Biblioteca do IES de Foz alumnas e alumnos dos cursos de 1º e 2º ESO que saben perfectamente por que un libro é un amigo 🙂

Vaian desde aquí moitísimas grazas a tod@s pola xenerosidade e implicación, por demostrar que … sodes un encanto!!

Un libro é un amigo porque…

“Un libro é un amigo porque sempre podes contar con el. Está alí a onde vaias, desfrutas con el e fala sobre o que ti queiras, pero sen desvelar nada que non queira contar. Non existen palabras para describir o que gozas cando les un bo libro, como cando pasas as horas cunha boa amiga ou amigo.” (Mariña)

“Un libro é un amigo porque abre as portas da imaxinación e déixaa voar moi lonxe.” (Sofía M.)

Un libro é un amigo porque fai que viaxes a outros sitios, lévate de aventuras tanto de terror como arriscadas e o máis importante, sobre todo nestes tempos, sen moverte da casa!” (Alba)


“Un libro é un amigo porque che axuda a ver a vida desde outro punto de vista.” (Gabriel)

Un libro é un amigo porque nunca te vai deixar de lado se o necesitas.” (Iago)

“Un libro é un amigo porque: cóntache os seus sentimentos, as súas emocións, desafógase contigo…” (Ainhara)

Un libro é un amigo porque estando con el axúdame a liberarme dos meus
problemas, axúdame a aprender cousas da vida e voar sen saír da casa.”
(Pablo)

“Un libro é un amigo porque…sempre están en case todos os lugares para poder soñar coas súas aventuras e viaxar a lugares descoñecidos e coñecidos sen movernos do sofá.” (Esteban)

Un libro é un amigo porque ensínache moitas cousas, tanto como para que ti mellores a lectura, a ortografía; tamén, divírteste moito coas historias que contén no seu interior; e ata ás veces ten “moralejas” que ti podes utilizar no teu día a día.” (Leticia)

“Un libro é un amigo porque permíteche entrar no seu conto, tamén porque axúdache a desconectar.” (Antía P.)

Un libro é un amigo porque está aí cando te aburres, te sentes só etc.
Tamén é un bo amigo porque che conta moitas historias e moi variadas, do que
queiras!” (Darío)

“Un libro é un amigo porque te acompaña a todos os sitios e momentos. Por exemplo: unha tarde chuviosa, moitas aventuras, ou mesmo a unhas vacacións. E ensínache a crear as túas propias aventuras.” (Nara)

“Un libro é un amigo porque che axuda a comprender mellor as cousas e
percorres o mundo a través das súas historias.” (Antía C.)

“Un libro é un amigo porque grazas a el non nos aburrimos, tamén grazas a el
melloramos a nosa velocidade de lectura, e finalmente grazas a el temos outra
nova historia na nosa mente.” (Christian)

Un libro é un amigo porque sénteste estar no personaxe e tamén porque se lle está prestando atención.” (David)

“Un libro é un amigo porque…porque os libros pódenche facer rir, chorar e sentir moitas emocións. Porque sempre que o necesitas está aí. Cando necesitas consultar algo ou só cando queres que che saquen un sorriso.” (Xavier V.)

Un libro é un amigo porque sempre está aí cando o necesitas. Podes pasar horas e horas divertíndote con el e imaxinar grandes aventuras. Cun libro podes experimentar diferentes emocións como intriga, felicidade, tristeza, amor e moitos outros sentimentos que converten un libro en algo máis, un amigo. “(Lucas G.)

“Un libro é un amigo porque nos axuda a esquecernos da nosa vida mentres os
lemos e fannos pasar un rato entretido no seu mundo.” (Nadia)

Un libro é un amigo porque sempre podo acudir a el para aliviar as penas, faime esquecer os meus problemas e refuxiarme nun mundo marabilloso cheo de criaturas fantásticas. Tamén me ensina valores e me dá leccións de como enfrontarme á vida ou incluso fai desenvolver a miña capacidade de dedución para resolver diversos casos. Un libro é un verdadeiro amigo.”(Bruno)

“Un libro é un amigo porque sempre que queiras ter un momento de tranquilidade e diversión, el nunca che vai dicir que non.” (Jacobo)

“Un libro é un amigo porque nos axuda a divertirnos, pasar o tempo desfrutando das súas aventuras e a aprender, aumentar vocabulario, corrixir a ortografía e valorar o bo que é ler.” (Marta)

Quedamos sen festa final do Correlingua en Foz :(

A organización do Correlingua comunica que se cancela a festa final que estaba prevista para o vindeiro 14 de maio en Foz 😦

Facíanos ilusión que a celebración dos 20 anos de Correlingua coincidise coa cita da Mariña en Foz, mais vivimos circunstancias excepcionais…

Así e todo, ao 2020 quédanlle por diante meses de “Vinte coa lingua” e actividades asociadas… Aproveitémolo!! 🙂

2 de abril, Día Internacional do Libro Infantil e Xuvenil

E así, dentro dun estado de alarma co que tamén estamos a escribir a historia, chegamos xa ao 2 de abril, data na que se celebra o Día Internacional do Libro Infantil e Xuvenil. Compartimos convosco o cartel conmemorativo que editou a IBBY (International Board on Books for young people). A ilustración é da debuxante Noemí Villamuza e a mensaxe, que podedes ler en galego e nas outras tres linguas oficiais do Estado, é obra do escritor Eliacer Cansino.

Animámosvos a ler, sempre. Coas velas despregadas, seguimos navegando!!

https://www.edu.xunta.gal/biblioteca/blog/files/tripticoA5.pdf

20 de marzo, Día da Narración Oral

No Calendario do Libro e da Lectura o 20 de marzo é un día sinalado, celébrase nada menos que o Día Mundial da Narración Oral! E que podiamos facer desde o Equipo de Dinamización, dentro dunha situación tan excepcional como a que estamos a vivir? Ocorréusenos implicar o alumnado de 1º e 2º ESO na celebración e compartimos con el un relato de Séchu Sende,“A agulla de marear”, ao que lle puxemos voz e que aquí vos deixamos 😉

https://drive.google.com/open?id=1Y-v7SYp4TDZlnyUKGhxspZEGAL4r9xse

Por certo, non esquezades que hoxe é o Día Mundial da Poesía, para o que a ONU escolleu neste 2020 o lema “Poesía, expresión lingüística da nosa humanidade común”.

Moito ánimo e lede, contade, recitade… creade!

24 de febreiro, Día de Rosalía de Castro

O alumnado de 1º e 2º ESO nas clases de Lingua Galega sumouse á celebración do Día de Rosalía a partir da reflexión sobre unha pregunta: que estrañarían de seren errantes polo mundo? A iniciativa, que naceu do lema escollido este ano pola AELG, “Errantes polo mundo”, mostra un amplo abano de emocións e sentimentos, lugares, palabras, sabores… e moita creatividade!! 🙂

Marchando unhas coplas de Entroido!

Chegamos neste curso á 16ª edición do Concurso de Coplas de Entroido convocado polo Equipo de Dinamización da Lingua Galega. E sabedes que? Por segundo ano consecutivo armou as coplas premiadas Bruno Rodríguez Docobo, desta volta a ritmo de “A bamba”.

Que artista!!

Aquí volas deixamos:

O Entroido está a chegar

Profesores, profesoras!

Compañeiros, compañeiras!

Animade xa esa cara

chegan os tempos de lerias.

Chegan os tempos de lerias,

o Entroido está a chegar.

Xa estamos en febreiro,

que ben o imos pasar.

Dende o Carnaval pasado

moitas cousas en Foz cambiaron,

Castiñeira xa marchou

e a Cajoto nomearon.

A Cajoto nomearon,

non se pode pedir máis.

O primeiro que el fixo

foi cambiar todos os sinais.

Onde antes se baixaba,

agora tempos que subir.

Rúa abaixo, rúa arriba

non sabemos por onde ir!

Comezamos no Instituto,

cun concurso sen igual,

este ano de película

un “Óscar” imos levar.

Uns cantan, outros bailan,

outros teñen que actuar,

seguindo as coreografías,

canto imos desfrutar!

E despois de tanta festa,

a fame vainos entrar,

a ver se os de Hostalería

nos preparan o xantar!

Roscas, filloas, orellas,

un cocido non vai mal!

Todos xuntos comeremos

festexando o Carnaval!

BRUNO RODRÍGUEZ DOCOBO

Premiad@s no 2º Concurso de recitado

O 2º Concurso de recitado sobre poemas de Rosalía de Castro e Manuel María coñeceu os seus gañadores o día 14 de febreiro. De novo, o alumnado demostrou a súa capacidade para emocionar cos versos de dous grandes da literatura galega. O xurado, formado por Jesús A.García Cortázar, M.José Mon López e Pilar Cordeiro, non o tivo doado á hora de valorar.

O primeiro premio recibiuno Bruno Rodríguez Docobo, recitando a Manuel María.

O segundo premio foi para Sofía Manín Rodríguez, que recitou un poema do libro Os soños na gaiola.

O terceiro premio levouno Alba Martínez Peña, que puxo voz a versos de Rosalía.

Parabéns aos tres!!

Bruno e Sofía, ademais, clasifícanse para representar o IES de Foz na fase final do concurso. Desexámoslles boa sorte e que gocen da experiencia!

Xaneiro con Castelao

A tradicional homenaxe a Castelao no mes de xaneiro por parte Equipo de Dinamización da Lingua Galega consistiu desta volta nunha exposición de imaxes da súa obra pictórica, aquela relacionada coa natureza, xunto co texto “A carón da natureza”, do libro Cousas. A decisión non foi casual, senón que obedece á importancia desta temática na obra de Castelao, tamén na súa faceta como pintor, e á colaboración coa Biblioteca, que escolleu o medio ambiente como tema para o vixente curso escolar.

As imaxes da exposición, que se instalou no vestíbulo do Edificio A para darlle maior visibilidade, foron tomadas da obra Castelao pintor, publicada na colección Biblioteca Castelao da editorial Galaxia.

Por outra banda, ao longo da última semana de xaneiro, varias estampas de Castelao dedicadas aos nenos servíronlle de inspiración ao alumnado de 1ºESO e 2ºESO para elaborar nas aulas relatos a partir delas. Estes traballos individuais da avaliación na materia de Lingua Galega son mostra de imaxinación e de creatividade.

Create your website with WordPress.com
Primeiros pasos